TUNG TUNG

Oleh : saripuddin siagian

Tungtung ibaen sian hayu bulat na ilubangi satonga,hampirdo di setiap musojid di daerah tapsel-madina adong do on.

pala inda itandai hamu dope,mulak ma hamu jolo tu hita an,kehe hamu tu masojid,ligi hamuma di sudut ni musojid i.pala adong nida hamu disi gantung hayu nagodang,ningroangku tungtung mai,anggo gulung do nida hamu dursat disi,inda tungtung i,bedug dei ningkalai gorarna.taiba dongan marjanji do ulang tokok kamu apalagi pas waktu arian di bulan puaso.ra dei ikojar halak sakampungi.

baen hita sannari madung di partongaan bulan sa'ban,inda onokbe nangkan na masuk ma hita tu bulan suci Ramadhan,taringot mada au tu tungtung na adong di musojid nami i di huta.

bia langa jabat dongan tungtung nai ?.

imada...pala masuk ma bulan puaso ibo ma roangku paida-ida tungtung i.harana nangkan na modar maia baenon selama bulan puasoon.

anggo di bulan na asing,jarang do ia di tokok,angkon na adong ma musibah baru itokok ia.anggo di bulan puaso naingotan kalak disia,apalagi mandonokkon marbuko.

disada maso najolo, mandonokkon bulan puaso,marpokat ma hami poso-poso di hutai,nangkan na ami makmurkon musojid i selama bulan puasoon.

"madeges amang i...au mandukung sepenuhna" ning amang boruima,kapala desa di hutai.

malam pertama sumbayang taraweh,dohot semangat 45 berangkat ma sude tumusojid an,lalu tusi madung bahat tobang-tobang di bagasan,jadi di suru ma bagian poso-poso dohot daganak di belakang.adong bagema namanggantung di teras ni musojid i harana habis tempat.

dung salose ma sumbayang taraweh,mulai ma martadarus,di buka alim ulama di hutai ma sebagai tanda martadarus di mulai.

saborngin,dua borngin lancar dope torus na sumbayang taraweh dohot tadarus on sampe tu malam sappulu na.harana anggo inda ro iba,ra dei idokon dongan namurtad.

malam pa sabolas na,mulai ma dongan-dongan on manyirik-nyirik tu balik ni tendai( pembatas ni dadaboru dohot alak lai ).

"sumbayang do nida hamu kawan si fatimah"....ning si ALI ma.

"sumbayang ..indu bo di baris paduana, patoluon sian pinggir" ning si umar mangalus.

"marjanji ami dabo nagiot marsuo naron habis taraweh di partadarusan ni nauli bulungan"...ning si ali .

"giot do ia langa di ho i" ning si umar busema songon na mangalap -alapi.

"nalayas ma roamu diau,bope kawan songonon nida ho au,nabahatan dei umak-umak namar nazar so au jadi babere nialai".ning si ali busema.

"olo ..uboto madai..aha nazar ni umak-umak i.bunuh diri sanga pindah sian hutaon",ning si umar busema inda tanggung pangarisakna.

salose sumbayang taraweh, sip-sip ma si ali kaluar sian musojid i torus mambelok arah tu parwudu'an an,baru mamintas tu topi dalanan.

lek gobak ma songoni abit karung na,lalu ma ia tu partadarusan ni nauli bulung an.

"e eh...udak ...giot tu dia do udak i",ning si maryam ma....harana tarparogok kalai di gang ni bagasi.

"mangaligi etekmu...disi do ia nida ho"...ning si ali ma laos pature-ture abit karung nia.

"inda pe ro udak"...ning si maryam ma dung ipareso ia tu bagasan.

juguk ma songoni si ali di golap-golapi painte si fatimah.

sian musojid an tarbegema madung mulai alak martadarus,nauli bulung pe mulai ma martadarus.

anggo si fatimah inda pe na mungkap mukona.ma marsak sajo roa nisi ali.

kehe au naron tu musojid an,aha ma udokon disi umar,ning roa nia sajo ma.

sampe tonga borngin ipainte ia,anggo si fatimah inda na marnaro.

akhirna mulak ia tu masojid an.ipa podom-podom ia ma di teras ni musojid i.

kira -kira jam 2 tonga borngin,mulai ma markumpul tu lambung tungtung on giot manokokna.

tibo ma waktuna sahur get itokok ma tungtung,mamago tokok-tokok na.

ijalakan-ijalakan inda tarida.madung adong bage nagiot mambuat batu giot baenon panokokna.

akhirna tarpaida ma , hape nai parbantal nisi ali do tokok-tokok nai.

indabedabe.....baen goyakna roa ni halaki,di angkatma si ali tu keranda ( tempat ni alak na mate ) na adong di sudut ni musojid i.

di tutup halai ma paten-paten dohot sajadah.

sekitar jam tolu mulai ma i tokok tungtung on.inda tanggung simburna,itarik bage dei mik ni musojid i ipadonok tu tungtung on anso martamba kuat sora na.

adopentong...mulaima marsibalosan dohot musojid naibaribai songoni juo musojid nai jului.madung satonga jom anggo tungtung on na torus dope i dakdak.

imantong ributna halak disi,anggo si ali umpe tarsonggot.

sodar ia, baen na sumbayang subuh do alak,iambang ia namanyumbayangkon ia.

golap songoni nida ia,taiba perasaan nia di bagasan musojid i do ia.iligi ia tu kanan sompit,iligi ia tu kiri sompit,akhirna iangkat ia tangan nia tu gincat,bo mangkat antong tutup ni kerandai.

baen songgotna roa nia,sanga aha so dibagasan kerandai ia,mangangguk doma ia lao mangalumpat siani.

bo rupa alak nagiot sumbayang di musojid i pe tarsonggot buse.iambang kalai na adong disi namate mangolu mulak.marlojongi buse sian musojid i.

adong bayo nagiot bahang ,ma mambaca innalloha wamalaikatahuyusolluna alannabi , irambankon ia mik nai ,terbang ia sian i.

bo... baen na rap tarsonggoti antong,akhirna itokok buse tungtung.

heran kalak...nabaru itokok dope waktu subuhi,ma mangkuling buse,marroan kalak tu musojid an.

keuntunganna.....inda tanggung rami ni halak nasumbayang subuh waktui.

akhirna rap mar sipantataan ma songoni dung habis sumbayang subuh.

AU ARAMBIR NAIPE TABO DO ULALA

oleh : saripuddin siagian

On da dongan carito di purba doon, harana dabo nabahaton do disi carito, tai manombo inda tartuliskon, harana mabiar iba ibaca inang ni daganak, mungkap buse non somor nia ..."nasongoni do langa abang dompak di Purba" ningia buse tongkinnai tu iba. Bo tarida ma antong roa muyu cokian niba, boti buse alai inda na sian purba.

Najolo, pala topet ma ari Sinayan waktu di Purba, nahurang sosak sajo ma ilala mulak sikola, pala tarbegema bahang sian musojid pukul dua bolas lewat, "madung bahang ayah.." ningiba mei tu gurui anso tibu ipamulak, harana mulak na jam sada do. Namilas sajo ma ilala bemper belakangi painte tu jam sada.

Borngin nai markumpul mei marsibaen acarana, adong na mambubur, mardahan mangan, adong buse antong namardobol monjap-monjap hahaha...harana mabiar ona razia, pala tardapot angkon na ipangan dei kartu dobol nai so baru salose hukuman.

Hami pe'ntong markumpul ma hami, mulo-mulo nai markombur, malapat-lapat sanga tudia-dia caritoi, mulai sian timur santak tu barat, taiba nangge dong kesimpulan ni on. Hum gorarna pe namarsidokon naidokonna do.

Jadi...dung bagas borngin ari, muloi ma boltok marngaok. "Ahama ita pamasak? madung male ulala" ning si Jobbar ma, baen ia tuan rumahna.

"Mambubur mada ita roangku jolo" rap ninna be ma mangalusi.

"Ah tiop malom Salasa dongan mambubur, naso bosan ma hamu i" ning si Kadir buse ma. "Malom Salasa na lewat ma paet sira, na lewat nai buse marhimpal-himpal gulo nai, na asing ma jolo dongan" ningia muse palalu obar.

"Aha doma tulang ita pamasak?" ning kalaima mangadop si Lobe. Baen ia disi nahum gincat kalasna, disia doma keputusan.

" Ningroangku anso tampil beda sabornginon "onde-onde majolo ita pamasak" ning si Lobe. Baenna usul on sian kalas pitu nai, rap marsipan ma hami songoni mangaminkonna.

"Adope..kei tabusi gulo, ho sadia ngen ko!" ningna ma. Dung ma rap ipakumpul rap ikarejoan ma lao marcarito.

Inda sadia onok antong masak ma onde-onde on, ibaenma tu tonga, lao namarkombur sambil ma ipangan onde-onde on.

"Memang tabo do pamasakmu ba", ning si Kadir ma mandokon si Jobbar, "Sugari adaboru ho, hodo ubaen parumaen ni dainang".

Lek marpupu ma songoni marsibuat sada be.

Jadi terakhir nai timbul mada masalah, onde-onde tinggal dua nai doma, hape alakna opat nai.

"Ho ma piga diho?"..ning si Lobe ma adop si Jobbar.

"Opat dope...tulang..."

"Ho..?" ninna buse ma adop au.

"Opat.... tulang.."

"Ho Kadir....?"

"Aupe opat dope ba tulang..." ning si Kadir buse antong.

"Aupe opat dope..., idia dua nai, aso hurang dua...?" ning si Lobe.

"Ning roangku tulang waktu mandai sira nai dei si Jobbar, bo itolonkon ia dua" ning si Kadir ma.

"Namalo mahoda tie, hodo uida nangkin namorgos-orgos di lambung ni kompori" ning si Jobbar busema inda ra kalah.

Marsisulahaan ma songoni mangan onde-onde naduaon, harana pala ibuat naron, adong ma dua halak nai naso dapotan.

Markombur pe jalan torus, inda binoto sanga aha namangua, mintop mada lampu camporong. Ibuat si Jobbar mantong korek api, serrr.. ningia isertek ia, pala tarida ma tangan ma di pinggani tolu, ima tanganku, tangan sikadir dohot tangan Silobe.

Au 'ntong ma utiop onde-onde nai sada, si Lobe pe songoni juo, ro mada si Kadir madung songon namaila, harana ma tarlambat ia manjomputna. I hais-kais ia ma songoni arambir nai, lalu mangaligi tu hami, "AU ARAMBIR NAI PE TABO DO ULALA"ningia lao mandilati tangan nia.

OMPUUUUNG....INDA ILEHEN IA

oleh : saripuddin siagian

Anggo on ise pe halak na anggo nasian hitaan mamboto do caritoon, harana waktu di Purba na lewati tarmasuk ma on sada carito na terkenalna, selain ni Mantik dohot Bayan Balagoh. Baen di blog on antong carito dohot kenangan masa lalu, jadi ita ungkap mulak anso lek rap riang be hita, rap mantata, minimal senyum-senyum sambil karejo.

Najolo antong inda dong dope taliphone, apalagi handphone. Anggo na binoto na adong pon-pon na motor sampagul ma ia dohot sibual-buali.

Pala giot mangalehen kabar iba tu huta, di tulis ma surat baru di lehen to parmotor nalewat, tolong jolo uda dabuon surat kon di sadu ningiba mai, idokon gorar ni huta nai. Pala di ingot supir nai antong tibu lalu surat nibai, pala lupa do ia ra bage do sabulan so sampe.

Hamu antong madung tagido hamu sannari ning tobang-tobangi ma tu iba i, pas do hamu songon mangan pisang namandung iubak, inda hona gota naibe. Anggo hami baya najolo, itoru di bodil ni bolandoi do, boltok madung male, giot mangan pe mabiar.

Imada..baen susahna najolo informasi dohot komunikasi, sering dei manombo sala pasampe tu nai tuju ning tulangima si Ibrahim (gorar aspal do daon) kalas pitu di purba lao mangiris kantang baen sambal sapoken.

"Adong langa tulang na sompat kajadian?" ning si Jobbar ma lao juguk di lambung nai.

"Imada...adong na mamanfaatkonna tu na asing" ning tulangi antong.

"Tar songon dia buse dei carito ni i tulang?"ning si Jobbar ma dohot si Kadir.

"Anggo songoni giling majolo bere lasiak i so udokon carito nai!" ning tulangima.
.....
Adong disada huta najolo, tinggal ma sada anak gadis dohot ompung nia. Anak gadis on na patuh mar ompung, sanga aha ning ompung nia, inda unjung i bantah ia. Rupana anak gadis on inda tanggung degesna, obukna lanjang, semampai pandok ni alak sannari, marlosung pipi hurum nai, pala minum ia ning halak songon natarida doma mangalir aek i di tolonan nia baen bontarna, pala mikim ia ra dei kalom mata niari i. Pokokna nasantak...!ning tulangi ma si Ibrahim senyum-senyum mamuloi carito.
Anak gadis on jarang doon kaluar sian bagas, paling ma pala kehe manyapsap tu aek sanga lao sumbayang tu suro na di tapian an. Inda songon anak gadis sannari, manombo inda binoto sanga idia bagasna. Tai soboto hamu, bo pe inda unjung ia kaluar sian bagas, anggo bunga melati i dabo isimpan pe lek na uskus dei.

"A..ah ise madongan gorar nii tulang?" ...nasantak ma ulalai, ning si Jobbar ma lao maradian na manggiling on.

Alaaa..imada bere, lupa au manyapai gorar nia sakalii, tai ita baen ma songoni si FATIMAH...ning tulangi antong.

"Palalu tulang e!"...nangkon sei tangion ia, naron igiling ia buse tangan nia ning si Kadir busema sian lambung ni kompori.

Imada...ma bahat poso-poso naro manyapai, anggo namarhusip antong ulang sapai hamu be, ias doma di toru ni tingkap ni alak si Fatimah i torus tu taruma nai songon parkaisan ni manuk, tai boto hamu bope songoni naso dong dope namartarimo di si Fatimah.

"Aha do tulang marhusip?" ning si jobbar busema.

"Ah..nabahat mantong sapaionmuda" ning si Kadir buse songon namanyonggak.

"Padiarma..saulaknai u caritoon pe carito marhusip sanga aha dei", ning tulangi buse antong.

Madung na bahatan alak lai na patah hati pamasang nisi Fatimah...adong bagema namangkuling-kuling sada-sada ia :

Sian parsabolas baya tu sigalangan
Maradian mai di padang matinggi
Sugari bolas baya pangidoan
Nangkan na hodo baenon induk ni api

Painte jolo tongkin tulang...utulis jolo nabaru idokon ni tulangi ning si Kadirma sambil mambuat pentak dohot buku.

"Tuuuueeehhh....!!!" pu pu idokon ko iba na santak...padahal ho dope nasantakna "ondekkang" ning si Jobbar sian samping, kaluar sompat bahasa Padang Bolak niai.

Marayak puaso antong marmulakan ma dabo par sikola Purba, lek tarbege juo ma tusuping ni alai mengenai si fatimah on. "Ima bahat na hamu dongan di hutaon inda lalu hamu, sadalak pe inda dong na sangkot", ning pokir on ma.

borngin dabo berangkat ma pokir on giot marusaho mandapotkan bunga desa on.

"Assalamu Alaikum"..ninna ma asok sian samping tingkap i, inda dong mangalusi, "amang dongan na tangkang on", ning pokir on ma di bagasan roa nia. Sampe tolu borngin di ulaki ia, inda dong juo namangalus. "Pala nasongoni, painte ho tolu-tolu ari on" ning roa ni pokir on ma.

Di sada ari, jam-jam sappulu manyogot, ro ma pokir on tu bagas nisi fatimah an. Adong antong kobun jegang ni ompung si Fatimah di samping bagasi. Itopotkon pokir on ma ompung nisi fatimah atiha manyalang-nyalangi duhut-duhut ma disi.

"Assalamu alaikum.."

"Alaikum salam..bo ho dei anggi, tudia doho?" ning ompung si fatimah antong.

Imada ompung..giot kehe manolongi alak ayah tu saba, tarida diau kobun jegang ni ompungon, na deges mantong i ning roangku. Pokir on pe asik ma marcarito-carito dohot ompung si Fatimah...tai ba dongan anggo Pokir on na marakal sajoma sanga songon dia carana so bisa marsuo dohot si Fatimah.

"Awas ompung.....!!!!" ning pokiron ma dabo marsurak. Sahinggo tarsonggot doma ompung i, hape giot tardege ompungi kaco.

"Aso do langa inda marsolop ompung, ima bahatna ison kaco" ning Pokir on ma.

"Imada anggi...dung lalu do au tuson baru uingot natinggal solopku, madung malosok kulala mangalapna" ning ompung si Fatimah antong.

"Pala dabo ualap tongkin ompung, naron bo tardege ompung kaco sanga paku bia dei..." adong do alak di bagasan??..."ning pokiron ma mamuloi rencana.

"Anggo ringgas roamu anggi, tolong majolo alapkon, isi do si Fatimah"ning ompung on buse antong.

Marangkat ma pokir on tu bagasan, lalu di alaman ni bagasi "Assalamu Alaikum" ningia ma langsung.

"Alaikum Salam" ninna mangalus sian bagasan lao mambuka pintu.

Pas dabo nida pokiron mungkap si Fatimah di pintui, humitir ma tot nia, ro hodok nia padohal nangali do ari, inda binoto ia sanga aha dokonon, dor doma manolon ijur, anggo matai antong bolnang sajo doma songon na itampar begu.

"Bo..abang do lakna i, ahadei luai abang...?" ning si Fatimah ma dabo mamuloi obar.

Anggo Pokir on, "ser gadubuk.... ser gadubuk" na ninna sajo do ma jantung nia, botul do langa baya na idokon ni alaki ning roa nia sajo ma dibagasan roa nia.

"Oo ee..., ooo...eee..." songon na mogap Pokir on mangalusina, "na isuru ni ompung do au nangkin tuson" ningia leng humotar.

"Aha dei roai abang?"...ning si Fatimah songon na penasaran.

"I'..i'..i'...Isuru ompung u tiop tanganmu" ning Pokir on ma dabo leng gogap.

"Oiiiii..inda jau ba abangi, ngana botul i, gabus ni abang dei roangku i" ning si Fatimah marrara muko nai.

"Inda purcaya ho dabo hu dokon, " tangion da so usapai....!!!!

"OMPUUUUUUNG...!!!!!" INDA I LEHEN IA.

"LEHEN ANGGI...!!! NA USURU DEI...!" ning ompung si Fatimah sian balik, ning roa ni ompung i antong solop do naso ilehen ni si Fatimah.

"Biado...kan madung ibege ho...!" ning Pokir on ma adop si Fatimah.

Pendek ni carita, dohot tarpaksa ilehen si Fatimah ma tangan nia sabariba di Pokir on, bo.. langsung antong itiop Pokir on antong tangan nai...anggo si Fatimah songon udang nai bolgang doma mukoi, marrara songon jambu erang, harana naso unjung dope ia dais tu alak lai.

Inda pe puas ilala Pokir on, giot itarik ia buse dope tangan si Fatimah sada nai, inda ra antong si Fatimah be.

"OMPUUUUUNG ....!!!!" SABARIBA DO ILEHEN IA ning pokir on buse ma dabo.

"LEHEN DUA-DUA ANGGI.....!" ning ompung si fatimah buse antong, ning roa ni ompungi...lek solop niai dope.

Akhirna itiop pokir on tangan nai dua-duana, nga roamuyu antong namaruntung mai Pokir on dongan?.

"Sugari adong handfone, kan bisa di hp jolo, sanga di sms" ning tulangima si Ibrahim lao martata.

"Astagfirullahalazim....!!!!!!!!!" ning si Jobbar ma marsurak....

"Ahado namangua he?" ning si Kadir buse tarsonggot.

"Mapistak batu ni lasiak tu matangku"..ning ia lao manjalaki aek.

"Imada ulang bolnang sajo mata niba pala marcarito alak" ning si Kadir busema lao manyuopi si Jobbar. Akhirna lupa doma alai carito, harana ma mangangguk-angguk sajo si Jobbar harana manyiak-nyiak mata nai.

Saima jolo dongan-dongan nadua tolu tie, Insya Allah ita baen muse mulak carito sanga andigan.

Batam, 03 Nopember 2009

Muqoddimah

Bismillahirrohmanirrohim

puji dohot syukur inda lupa hita ucapkon tu Allah swt na madung mangalehen kesehatan,kesempatan,dohot setitik ilmu tu manusia anso lek bisa mamboto dohot mngetahui.

sholawat dohot salam tu arwah ni junjunganta nabi besar Muhammad saw.mudah-mudahan hita mandapot syafaat sian beliau di ari pembalasan saulakon.

imada dongan nadua tolu,tarutama tu angkangi sekaligus sahabat FAS NASUTION MADINA / BULUNG GADUNG.atas bantuan dohot partisipasi sian dongan-dongan songoni sahabat,saotik demi saotik hita ungkap mulak carito-carito najolo,carito ni tobang-tobang di hitaan mudah-mudahan nian on sada modal dihita,bope sanga idia hita berada,ulang sampe mangalupaon carito songoni poda nadi sampeon ni orang tuanta.terkadang memang carito dohot ungkapan sering songon namarsianyang binege,tapi sabotulna di balik ni i terkadang adong do sada manfaat na bisa hita ambil hikmahna.insya Allah dison tongkin nai hami lebih banyak mangupas/marcarito tentang sada sikola na sangat hami cintai namadung mangelehen didikan dunia akhirat,ima PESANTREN MUSTHAFAWIYAH PURBA BARU MADINA. yach...setidakna hita marsilaturrahmi lewat dunia maya,rap margiri mantata,bope gorarna sambil mamangkur ataupe lagi mamuro,angkon lek na hita selingi do dohot keceriaan.

harana pala ma tegang tu pe pandok niguru ra dei manombo ompot-ompot tipulna.tarsongonimada jolo obarna sian hami,baen adong dontong kahanggi songoni anak boru songoni juo mora,pala adong antong nasala pature hamu,ulang padiar kamu malapat-lapat songoni tu baribaan.angkon na saling nasehat menasehati do.botimada.

assalamu alaiku wr wb.